tg-me.com/NHKCCC/385
Last Update:
【我哋想創造一個所有人都可以學到廣東話嘅世界】
細細個學英文嗰陣，好多人都用啲五顏六色嘅故事書，叫做 Graded Readers。佢哋入面啲英文有分難度嘅，有啲色就淺啲，有啲色就深啲。學英文嘅人可以循序漸進，慢慢掌握生詞，睇呢啲故仔書學英文，肯定好過喺學校抄字多多聲。我成日都諗，如果有呢種書俾人學廣東話，大家一定可以學得快好多啫！但係有呢個諗法嗰時，香港係連粵語寫嘅兒童書都冇。
香港明明有九成人係講粵語，點解啲兒童書同日常口語脫晒節嘅？我諗起一本叫 We’re going on a bear hunt 嘅書。本書喺英文世界好出名，係講一家人去森林打獵捉熊人嘅故事，我好鍾意個故仔，好鍾意個節奏。世界各國嘅小朋友，睇住英文版或者自己語言嘅譯本，父母可以唱或者讀出嚟，而小朋友會聽得明。英文版係噉樣嘅：
We're going on a bear hunt. We're going to catch a big one. What a beautiful day. We're not scared.
啲字可以唱出嚟，講出嚟，帶節奏，有感情，細路聽得明。
中文版就係噉樣：
我們要去捉狗熊／要捉一隻大大的／天氣這麼好／沒甚麼好怕的
講普通話嘅人，你照讀出嚟，啲細路會聽得好開心。但係講粵語嘅小朋友呢？佢哋都係睇住同一個中文版。但係讀落繞口，聽到耍手擰頭。喺聽繪本嘅故事嘅年紀，佢哋係唔會識呢啲日常唔用嘅詞㗎。咩叫「狗熊」？咩叫「這麼好」？同佢哋聽開嘅嘢唔同，讀出嚟唱出嚟，佢哋都一頭霧水。兒童文學用粵語寫，如果寫做噉：
我哋去捉熊人／要捉隻大隻嘅熊人／今日天氣咁好／唔會驚到震
大人細路都聽得明，你話係咪好好多呢？
我哋想教識小朋友對世界好奇，要用小朋友睇得明聽得明嘅語言文字，等佢哋可以用母語打通世界；要教識外地人，教識海外嘅第二代粵語人，亦都需要一啲用粵語寫嘅嘢，而唔係去學一堆「這」「那」「了」「的」「吧」，唔係學啲喺粵語區永遠都用唔到嘅北方話、普通話俚語。總之用粵語寫嘅書真係好緊要。
粵語唔單只唔會死，仲要永續發展。我哋深信香港嘅文化一定會吸引到世界各地嘅人都一齊學粵語。但係我哋唔想個個淨係識得用粵語講粗口，淨係用嚟應付生活。我哋要好多好多書，要有內涵嘅書！
最早嘅諗法只係翻譯外文故事。但係諗落我哋覺得，粵語應該係有自己嘅文學，應該要做一隻不斷創新嘅語言，一隻有原創作品嘅語言。於是我哋決定唔應該細做，唔應該就噉翻譯，要做返咁上下規模。而我哋定嘅目標係一千個故事。
一千。壹仟。１０００。jat1 cin1。One Thousand。
我哋知道呢個係一個好癲嘅計劃。但係喺過去一年半，我哋踏出咗第一步，整好咗一百個故仔，準備喺書展推出其中四十本書。我哋相信之後我哋做大個餅之後，令到大家周圍都見到粵文書。可以做到呢度，全靠每一個支持我哋嘅人，信任我哋嘅參加者。
我哋係冚唪唥。記住我哋個名，書展見！
插圖：SAM
BY New Hong Kong Cultural Club 新香港文化協會
Warning: Undefined variable $i in /var/www/tg-me/post.php on line 280
Share with your friend now:
tg-me.com/NHKCCC/385